Eldur kom upp í sumarhúsi í Tungufellsdal ofan við Flúðir um klukkan hálf fimm í gær. Slökkviliðseiningar Brunavarna Árnessýslu frá Flúðum, Reykholti og Laugarvatni voru boðaðar út vegna eldsins. Mikið kjarrlendi er á svæðinu og óttuðust menn því hættuna á umtalsverðum gróðureldum í kjölfar húsbrunans ef eldurinn næði að læsa sér í gróðurinn. Slökkviliðsmenn frá Flúðum voru fyrstir á staðinn og slökktu reykkafarar þeirra eldinn á skömmum tíma og náðu þannig að lágmarka það tjón sem þegar var orðið.

Mikið hafði rignt á svæðinu undanfarin sólarhring sem dró verulega úr hættu á gróðureldum í kjölfar húsbrunans.

Vefumsjón