fimmtudagurinn 22. maí 2008

Sinubruni við Tjarnarbyggð

Ljósmynd ÁÞ af vefsíðu Landgræðslu ríkisins.
Ljósmynd ÁÞ af vefsíðu Landgræðslu ríkisins.

Um klukkan 14:20 í dag var slökkvilið Brunavarna Árnessýslu kallað að búgarðabyggðinni í Tjarnarbyggð, sem er á milli Selfoss og Eyrarbakka, vegna sinu. Ekki var um mikinn eld að ræða og var búið að slökkva eldinn tæpum 25 mínútum eftir að útkallið barst. Rétt er að vekja athygli á því að jarðvegur getur verið þurr um þessar mundir og getur sina kviknað því mjög auðveldlega. Bændur sem þurfa að kveikja sinu vegna ræktunar þurfa sérstakt leyfi til að kveikja sinu og þarf það að vera gert í samráði við slökkvilið.

Rétt er að vitna í frétt af vef Slökkviliðs Akureyrar, (www.slokkvilid.is) þar sem segir;

"Áður fyrr var oftast um útköll að ræða vegna fikt barna og unglinga en góðu heilli hefur þeim útköllum fækkað mjög með markvissri fræðslu og góðu eftirliti foreldra og ábyrgri hegðun barna.  Hins vegar hefur útköllum fjölgað vegna sinubruna í sveitum þar sem oftast er um að ræða að ábúendur kveikja viljandi í sinu og oft með leyfi frá  sýslumanni og jákvæðri umsögn umhverfisnefndar viðkomandi sveitarfélags.  Þá er oftast um að ræða eld sem viðkomandi missa stjórn á eða veldur óásættanlegri mengun fyrir nágranna. 


Við teljum að allt fordæmi fyrir því að brenna gróður eða annað á víðavangi er slæmt nema þá að sterk rök mæli með því, tryggt sé að eftirlit sé með brunanum og viðeigandi varúðarráðstafanir séu gerðar. Við höfum unnið markvisst í því að stemma stigu við íkveikjum án leyfis, bæði hjá börnum og fullorðnum og bent á hættur því samfara.   Útköllum vegna sinubruna eða bruna í rusli fylgir alltaf nokkur kostnaður vegna innkalla slökkviliðsmanna á frívakt og notkunar tækja sem ekki voru þá til taks vegna annarar hættu sem upp getur komið á sama tíma.

 

 

 

Reynslan hefur sýnt að afar erfitt getur verið að halda sinubruna í skefjum eða takmarka hann við ákveðin svæði.  Benda má á mjög mörg dæmi þess að saklaus sinubruni fór úr böndunum og olli tjóni, bæði á gróðri og mannvirkjum.

 

 

 

Síðast en ekki síst getur sinubruni valdið mikilli mengun vegna þess að um mjög ófullkominn bruna er að ræða og aðeins hluti eldsneytis breytist í orku en megnið verður að reyk.  Slíkur reykur getur reynst hættulegur eins og allur annar reykur sem verður við ófullkominn bruna á lífrænum efnum.  Í flestum tilfellum er þó aðeins um óþægindi að ræða en mikil sterkja og lykt fylgir brennslu á sinu.  Hafa verður því í huga ríkjandi vindáttir, vindstyrk og nálægð við þéttbýli þegar slík leyfi eru veitt."

Vefumsjón