Árekstur tveggja bíla varð á brúnni yfir Stóru-laxá í Hrunamannahrepp um klukkan tíu í morgun. Áreksturinn atvikaðist þannig að vöruflutningabifreið var ekið yfir brúna sem er einbreið, þegar að fólksbifreið var ekið inn á brúna úr gagnstæðri átt með þeim afleiðingum að fólksbifreiðin lenti framan á vöruflutningabifreiðinni. 

Mikill viðbúnaður var hjá viðbragðsaðilum vegna slyssins en sex manns voru í bifreiðunum. Tækjabíll frá Brunavörnum Árnessýslu á Flúðum var sendur á vettvang, lögregla, sjúkraflutningar Heilbrigðisstofnunar Suðurlands auk vettvangshjálparteymis frá Flúðum fóru á vettvang.

Allir þeir aðilar sem voru í fólksbifreiðinni voru fluttir á Heilbrigðisstofnun Suðurlands á Selfossi til nánari skoðunar en svo virðist sem að ekki hafi orðið alvarlegt slys á fólki við áreksturinn. 

Vegurinn er ennþá lokaður og verður um hríð meðan að unnið er að því að ná bílunum af veginum. 

Haukur Grönli miðvikudagurinn 13. desember 2017

Fræðsla í forgangsakstri

1 af 3

Forgangsakstur var tekin fyrir á æfingum desembermánaðar hjá Brunavörnum Árnessýslu. Norðmenn hafa í nokkur á verið með forgangsakstursnámskeið fyrir viðbragðsaðila sem tekur tvær vikur og endar með verklegu prófi hjá prófdómara frá ríkinu.

Lögreglan á Íslandi hefur kennt eftir þessari aðferð í nokkur ár.

Forgangsakstur er ekki að kveikja á sírenum, bláum ljósum og keyra eins hratt og hægt er. Forgangsakstur gengur út á að koma viðbragðsaðilum fljótt og örugglega á staðinn og stýra umferðinni þannig að ökumenn forgangsaksturs tækja þurfi ekki að sveigja mikið eða að vera í miklum hraðabreytingum.
Aðferðin sem er kennd við Noreg gengur út á notkun sírena og til viðbótar bláu ljósunum að blikka kösturum framan á viðbragðsbílunum. Með því að blikka kösturunum taktfast þá hefur það sýnt sig að umferðin tekur fyrr eftir forgangsaksturs tækjum og við getum stýrt umferðinni betur.

Við fengum Björgvin Óla, sjúkraflutningamann hjá Heilbrigðisstofnun Suðurlands, til að halda þessa fræðslu. Hafði hann sett saman mjög góðan fyrirlestur í samráði við Lögregluna á Suðurlandi og Brunavarnir Árnessýslu þar sem stuðst er við hina svokölluðu norsku-aðferð. Það var almenn ánægja með þessa fræðslu og fékk Björgvin Óli mikið hrós fyrir.

Lárus þjálfunarstjóri Brunavarna Árnessýslu fór svo yfir Tetra (talstöðvar) þar sem verið var að taka upp svokallað dulkóðað kerfi hjá lögreglu, sjúkraflutningum og slökkviliðum og samskipti í gegnum þær, talhópa o.fl.

 
Pétur Pétursson mánudagurinn 11. desember 2017

Bílvelta og eldur í bíl 08.12.2017 

1 af 2

Bílvelta varð síðastliðinn föstudag við vegamót Biskupstungnabrautar og Reykjavegar. Fimm ungmenni voru í bifreiðinni á leið heim úr skóla en engin alvarleg meiðsl urðu á þeim vegna atburðarins. 

Skömmu eftir að bifreiðinn valt kom upp eldur í henni sem breiddist hratt út. Það vildi ungmennunum til happs að engin festist í bifreiðinni en hún hafði lent í skurði. 

Slökkviliðsmenn Brunavarna Árnessýslu frá Reykholti voru fyrstir á staðinn og réðu þeir niðurlögum eldsins. Þeim til aðstoðar komu einnig slökkviliðsmenn Brunavarna Árnessýslu frá starfsstöðinni á Flúðum. 

Pétur Pétursson mánudagurinn 11. desember 2017

Eldur í bíl í Kömbunum 11.12.2017 

1 af 3

Eldur kviknaði í bíl í Kömbunum á tíunda tímanum í morgun. Slökkviliðsmenn frá starfsstöð Brunavarna Árnessýslu í Hveragerði voru sendir á vettvang og slökktu þeir eldinn. Ökumaður var einn í bifreiðinni þegar að eldurinn kom upp og varð honum ekki meint af. 

Bíllinn er mikið skemmdur en brann þó ekki að öllu leiti. Talið er að eldurinn hafi kviknað út frá rafkerfi bílsins. 

1 af 2

Eldur kom upp í þurrkara í íbúðarhúsnæði í Hveragerði síðastliðið föstudagskvöld. 

Þegar íbúar húsnæðisins urðu eldsins varir réðust þau með duftslökkvitæki gegn eldinum en það dugði ekki til. Þau lokuðu þá hurðinni að rýminu og komu sér hið snarast út og hringdu á Neyðarlínuna 112 og óskuðu eftir aðstoð slökkviliðs. 

Þannig vildi til að slökkviliðsmaður hjá Brunavörnum Árnessýslu sem fékk útkallið var í næsta nágreni og var kominn á staðinn rétt eftir að útkallið barst. Hann mat aðstæður þannig að hann gæti á öruggan hátt farið inn með annað slökkvitæki og skotið á eldinn til þess að tefja fyrir útbreiðslu eldsins sem hann og gerði. 

Slökkviliðsmenn frá starfsstöð Brunavarna Árnessýslu í Hveragerði voru fljótir á vettvang á dælubíl og réðu að lokum endanlega niðurlögum eldsins með vasklegri framgöngu reykkafara. 

Það er ljóst að íbúar hússins hafa án efa komið í veg fyrir stórfellt tjón með sínu snarræði. Það er að segja, með því að hringja í 112 hið snarasta, hafa til taks slökkvitæki, nota það á réttann hátt og loka eldinn inni í rýminu þannig að súrefnisskortur skapaðist í umhverfi eldsins. 

Vefumsjón